കുറ്റം

നോക്കി നില്‍ക്കേ
മാഞ്ഞു പോവുകയാണ്
കുട്ടികളെന്ന് തൊടികളിലവരുടെ കളികള്‍ക്ക്
കാവല്‍ നിന്ന മരങ്ങള്‍

കാണാതെ പോയ കളിപ്പാട്ടം‍
തിരഞ്ഞു കരയുന്ന
കുട്ടിയെ കൂടെ കൂട്ടിയാലോന്ന്
വഴിയിലെ ചെടികള്‍

മുറ്റത്തെ
ഒതുക്കു കല്ലുകളവനെ
മെല്ലെ എടുത്തു വെക്കുന്ന പോലെ
കൂട്ടിക്കൊണ്ടു വരുന്നുണ്ട്

അവനെന്‍റേതല്ലെ
എടുത്തുമ്മ കൊടുത്ത്
കണ്ണ് തുടച്ചും കവിളില്‍ തലോടിയും
ഓമനിക്കാതെ

വരികളിലേക്കവനെ
എങ്ങനെ
കവിതക്കു കൂ‍ട്ടാമെന്ന ഈ നോട്ടം
കുറ്റകരമല്ലേ
?